خلاصة تجربة رحلتي العائلة لاندونيسيا

خلاصة تجربة رحلتي العائلة لاندونيسيا

1- الاسعار غالية اكثر من أول فانا من عشاق العمة زرتها اكثر من 8 مرات وهذه اول مره عائليه كل سنه تزيد الاسعار وتقفز مدري وين بتوصل .

2- تفاجات في المطار في مكتب كاها مافي حجوزات في فنادق كنت مقترحه وشقق وكل شي فل بالقوة لقيت فندق 5 نجوم فندق بروبودور جاكرتا
ولذلك من وجهة نظري احجز الفندق من السعوديه وسلم فلوسك واضمن الحجز لو يوم واحد وريح دماغك .

3- لاأحد يكثر شنط تعب وسياراتهم ضيقه ماتشيل عفش كثير بعدين تضظر تستاجر سيارتين .

4- لابد تستفيد من ملحقات الفندق مثل مسبح اذا فيه سونا بخار او غيره .

5- مطعم الجزيرة انصح الجميع لاتشترون منه حرامي كبير اسعاره اغلى من السعودية ومبالغ فيها اخذت عشاء للعائلة
طلع الحساب 900 الف ربية مبلغ فلكي

6- السائقين دائما يوهمون السائح بان الجبل فل وزحمه والفلل محجوزه وانه يعرف فلل طيبه واغلبهم يودون السياح الى مجمع
كوتا بونقا .

7- فلل كوتا بونقا بوجهة نظري غير جيده اولا بعيده مره , ثانيا اسعارها غاليه تؤجر ب700 الف وهي سعره الحقيقي 300 الف روبيه
بس يوم يعرفون انك سعودي يرفعون السعر
أمر اخر موحشة مره في الليل ومخيفه مره ولايوجد فيها حوش ولا امن ولا امان البعض يقول فيه بوابات لكن اخر الليل تشوف اشكال
ودبابات وناس تدخل وتخرج وتدق الباب اخر الليل وحراميه

8- سكنت في فله قريبه من حديقة الحيوان سفاري لواحد صيني حلوه بس الاولاد انزعجوا من الحشرات والوزغ واسرة النوم غير مريحه وغير جيده
بنسبه لي انا عادي مافي مشكله بتحمل بس المدام والاولاد ماتقبلوا هذه الشي طبعا نحن عائلتين سكنا بفله وحده اقارب

9- التيوس من 400 الى 500 الف ربيه كل بعد فتره تزيد اسعارها وطبعا محلات التيوس التي بجوار البقالة السعوديه غالين
لكن يوجد اماكن ارخص .

10 - وفقنا في شغاله مره طيبه وامينه وتتكلم عربي وطباخه درجة اولى وبنت حلال يوميا نعطيها 100 الف ربيه .

11- حديقة سفاري روعه بس سعر الدخول مرتفع بس هو ثابت ومعروف بس اذا عندك عدد بيكون ميزانيه .

12- عرض الكوبي جنان بس الاولاد خافوا منه بس متعه .

13- حديقة الزهور متعه بس الله يعينكم على المشي والحركه .

14- بحيرة الليدو حلوه بس السفينه تركبها 300 الف ربيه كثير بصراحه .

وسمكهم حلو طعمه بس ناشف احسه مدري ليش .

15- البقالة السعوديه او التي تبيع بضائع من السعوديه غالية جدااااااااااااا اغلى من السعودية باضعاف كثيره ولذلك لابد تاخذ اغراضك كلها من السعوديه
ماعدا الخبز , والخبز للاسف عندهم غاليه مررررررررررررررره
يوجد بديل عن البقايل السعوديه سوبرماركت اندونيسيه واسعرهم اقل شركة معروفه نسيت اسمها اسعارهم معقوله ولايرفعون علينا .

16- الشوي في الفله روعه واجواء كانت خلابة وامطار كل يوم الجو جميل في فتره الحج افضل فتره.

17- كثرة العوائل في الحج وهذه شي طيب عشان يخف عدد العزاب ومشاكلهم الكثيره وهم ليسوا كلهم كذه .

18- الحجز اولا اذا طلعت للجبل على اساس الرجعه لجاكرتا من بدري وتاكيد الحجز ضروري .

19- بصراحه كنت واضع ميزانيه معينه للرحلة والله صرفت اكثر مما كنت اتوقع ولذلك لازم يكون عندك احتياط كاش وبطاقات صراف .

20 - بصراحه اندونيسيا غاليه قابلت عوائل كثيره يشكون معدل مصروفاتهم من 1000 ريال سعودي يوميا الى 2000 يوميا شامل كل شي
سكن وسياره واغراض ومنتزهات يعني مصروف مبلغ يعتبر بصراحه كبير يوم تكون بعائله يفرق عن الشباب .

21- فندق ميركوري انشل غرفه غير جيده ونمل واحسن شي فيه المسبح واللوبي بس .

22- مدينة انشل روعه انبسط الاطفال فيها .

23- اسواقهم مره غاليه والله انها اغلى من السعوديه مدري ليش ولافي شي يستاهل تشتريه .

هذه مجمل التجارب والخواطر

اتمنى التفاعل مع ماكتبته

الله يعين أخي رمان
الدور عليه لأني مسافر بالعائلة في يناير
أن شاء الله
والله يعينني عل مصاريفهم
وطلباتهم اللي ما تخلص

دمت بخير ياغالي